Diabète e Senegaal : ASSAD ɗaɓɓitii yo nyaw oo naatne e Couverture sanitaire universelle
E yeeso coggu mawngu ñawndugol diabète, Association sénégalaise de soutien aux diabétiques (ASSAD) noddii laamu Senegaal ngam naatnude ndee nyaw juutnde e Couverture sanitaire universelle (CSU). E ko président mum, Baye Oumar Guèye, holli, 87 % e ñawɓe ɓe fedde ndee toppitii ko ɓe ummii e galleeji ɗi ngoni e caɗeele ceede.
Ceede ñawndugol ena mbaawi yahde haa 75 000 FCFA e lewru
E udditgol kampañ nasional reentinagol e dow diabète, ñalawma alarba e Dakar, Baye Oumar Guèye haaltii e dow caɗeele finans ɗe ñawɓe ɓee heɓata.
E ko o holli, ñawndugol neɗɗo mo heɓi diabète type 1, mo huutortoo insuline, ena waawi yahde haa 75 000 FCFA e lewru, hakkunde garabji, konsultasioŋaji e ƴeewtagol cellal.
Président ASSAD oo weltii golle laamu, ɓurɗum ɓeydude subvensioŋ insuline gila milioŋ 300 haa ɓur milioŋ 500 FCFA. O siftinii kadi wonde insuline e kuutorɗe mum ko caahu ngam sukaaɓe ɓe njeyaa e porogaraam musamman.
Caɗeele e toppitagol ñawɓe
Badara Gaye, vice-président Antenne des jeunes diabétiques de Dakar, mettii sabu coggu ƴeewtagol cellal e leeltugol juutngol e nokkuuje ñawndugol.
Mo anndinaa diabète e 2009, o hollii wonde ɗee caɗeele ena mbaawi waɗde yoga e ñawɓe luuttu rendez-vous maɓɓe, tawa ɗum ɓeydata kulol caɗeele cellal.
Yiytude nyaw oo law ko faandaare mawnde
Professeur Abdoulaye Lèye, spécialiste endocrinologie e diabète e hôpital Pikine, teeŋtinii nafoore yiytude nyaw oo e jaawngol.
O wi'i : « No a ɓuriri anndude ngonka cellal maa law, noon a ɓurirta waawde reende hoore maa e caɗeele ɗe mbaawi arde. »
O wasiyii kadi ñaamdu moƴƴundu, yantugol e sport sahaa kala e ɓeydude ganndal ñawɓe e dow toppitagol nyaw maɓɓe.
E miijo ASSAD, naatnugol diabète e CSU maa wallu ustude ceede ɗe musiɓɓe yoɓata e newnude heɓugol ñawndugol e sahaa juutɗo.
Fouta TV - L'information au service des citoyens.
