Janngooɓe rewɓe polis jeeɗiɗo riiwtaa sabu reedu : Guy Marius Sagna ɗaɓɓitii yo ɓe artine e formation
Depitee Guy Marius Sagna yeddii riiwtugol janngooɓe rewɓe jeeɗiɗo e promotion 49ɓere École nationale de police sabu ɓe ngoni e reedu. Caggal nde o heɓi jaabawol ministre de l'Intérieur e naamnal binndangal ngal o neldinoo, o yeddii daliiluji administration, tee o ɗaɓɓitii yo rewɓe ɓee mbaaw artude e formation maɓɓe.
Riiwtugol ngal o jogii no peewaani
E binndol mum, Guy Marius Sagna yeddii cuɓaande nde waɗanoo e sahaa ancien ministre de l'Intérieur, Me Bamba Cissé, nde lomtoowo mum Mouhamadou Makhtar Cissé reentinii.
E miijo mum, sarɗiiji ɗi ministère oo huutorii, ɓurɗum ɗi njowitii e njuɓɓudi janngugol e teddinde discipline, mbaawaa wonde daliilu riiwtugol debbo sabu reedu.
O naamnii : « Gila mande reedu debbo wayliima ŋakkere pointji janngugol walla bonnugol sarɗiiji discipline ? »
Depitee oo yeddii kadi ceertingol hakkunde janngooɓe worɓe e rewɓe polis, tawa o jogii wonde reedu fotaaki waɗde debbo majja darnde nde o heɓi e concours.
Ɗaɓɓugol artugol e formation caggal jibingol
Rewɓe jeeɗiɗo ɓee gollinoo tawo no policières adjointes volontaires, hade ɓe jaalude concours ngam naatde École nationale de police.
Formation maɓɓe fuɗɗinoo ñalawma 3 mars 2025. Caggal nde ɓe njanngii fannu aranɗo, ɓe yamiraama yahde e congé de maternité e juillet ndee hitaande, e ko depitee oo holli.
Guy Marius Sagna jogii wonde ɓe mbaawi artineede e promotion 50ɓere walla 51ɓere, ngam ɓe njokku janngugol maɓɓe.
O teeŋtinii : « Laamu foti artude e cuɓaande mum. »
O noddii kadi ngam hesɗitinde sarɗiiji formation polis, ngam haɗde kala ceertingol hakkunde yimɓe sabu reedu. O ɗaɓɓitii rewɓe jeeɗiɗo ɓee ngam ɓe kollu kadi no haala ndee waɗiri e ɗo maɓɓe.
Fouta TV - L'information au service des citoyens.
