FIFA : Gianni Infantino e hakkunde yeddondiral e dow mbaawka mandat nayaɓo
Mbaawka Gianni Infantino artude e cuɓagol président FIFA umminii yeddondiral e dow sarɗiiji laawol. Miguel Maduro, ancien président Commission de gouvernance FIFA, jogii wonde mandat nayaɓo ena yeddondiri e sarɗiiji fedde ndee. O noddii ngam yahdinde ndee haala e Tribunal arbitral du sport (TAS).
Sarɗiiji mandatji tati e hakkunde yeddondiral
E haalaaji ɗi The Athletic humpitiri, juriste Portugais Miguel Maduro yeddii mbaawka Gianni Infantino artude e cuɓagol kesol.
O wi'i : « Article 33, paragraphe 2, e sarɗiiji FIFA ena laaɓi no feewi : hay gooto waawaa waɗde mandat président ɓurɗi tati. »
E miijo mum, hooreejo FIFA mo jeyaa Italie e Suisse, mo cuɓaa e 2016, tee o artinaa e 2019 e 2023, heɓii timmugol limre mandatji ɗi sarɗiiji yamiri.
Mandat aranɗo woni daliilu yeddondiral
Yeddondiral ngal njowitii ɓurɗum e sahaa hakkunde 2016 e 2019. Gianni Infantino cuɓanoo e février 2016 ngam timminde mandat ancien président Sepp Blatter.
FIFA jogii wonde ndee sahaa aranɗo fotaaki limteede e mandatji tati ɗi yamiraa.
Kono, Miguel Maduro yeddii ndee faamde sarɗiiji. E miijo mum, alaa huunde e ɗereeji FIFA nde yamiri yo ndee sahaa itte e limgal mandatji.
O noddii ɗi njeddi candidature hesere Infantino ngam ɓe yahdinu ndee haala e Tribunal arbitral du sport (TAS), ngam heɓde ñaawoore e dow ko sarɗiiji FIFA yamiri.
So ndee haala yahdinaama e TAS, tribunal oo ena waawi ƴeewtude yeddondiral ngal hade cuɓagol président FIFA kesol waɗeede. Haa jooni, ndee haala ko yeddondiral e dow faamde sarɗiiji mandatji.
Fouta TV - L'information au service des citoyens.
