Fatick : ANER eɓɓii waɗde lampadeeji solaire 18 925 e investismaaji milyaar 23,2 FCFA

Lampadeeji 9 762 waɗaama haa jooni

E lampadeeji 303 000 ɗi eɓɓaa e leydi Senegaal fof, 18 925 ko diiwaanu Fatick njeyi.

E ko Thierno Alia Mbengue holli, fannuji ɗiɗi aranooji porogaraam oo mbaawii waɗde lampadeeji 9 762. Fannu tataɓo, mo woni e golle jooni, ena eɓɓii waɗde ɗi keddii 9 163.

Gouverneure Ngoné Cissé, mo tawnoo e hawrondiral ngal, weltii ndee golle, tawa o teeŋtinii nafoore lewru laabi e nokkuuje renndo ngam semmbinde kisal yimɓe.

ANER eɓɓii udditde biro diiwaanu e Fatick

Directeur général oo humpitii kadi anniya mum ngam ɓadnude golle ANER e yimɓe, rewde e udditde birooji e pôles économiques jowi Senegaal.

Fatick ena ɗaminaa jaɓɓude biro pôle Centre, ngam moƴƴinde toppitagol lampadeeji ɗii e ñawndugol ɗi so ɗi bonii.

ANER ena eɓɓii kadi semmbinde sarɗiiji ngam reende kuutorɗe solaire ɗee e bonnugol.

Porogaraamji enerji goɗɗi ngam renndo

Ɓaawo lewru laabi, ANER ena yeesoɓtina porogaraamji ngam addude elektrik solaire e kuutorɗe renndo.

Porogaraam ORIO ena jeyaa e nokkuuje 53 e diiwaanu Fatick, e finansmaaji milioŋ 603 FCFA ɗi humpitiraa.

Golle goɗɗe njowitii e pompage solaire ngam ndiyam remagol, suuduuji ɓuuɓɗi ngam mooftude ñaamdu, plateformes multifonctionnelles e huutoraade salte organik ngam sosde enerji.

Rewde e ɗee porogaraamji, ANER ena yiɗi ɓeydude heɓugol enerji solaire, semmbinde kisal e wallude yeesoɓtere ekonomi e renndo diiwaanu Fatick.

Fouta TV - L'information au service des citoyens.