Dakar : Gendarme gooto maayii, nayo gaañaama e aksidaaŋ hakkunde laanaaji ɗiɗi e base navale Amiral Faye Gassama
Aksidaaŋ hakkunde laanaaji ɗiɗi Gendarmerie nationale addii maayde gendarme gooto e gaañugol nayo goɗɗo, ɗoon e tato ɓe ngonka maɓɓe tiiɗi no feewi. Ndee tampere waɗii e jemma asewe 31 octobre 2026, e base navale Amiral Faye Gassama, Dakar. Comité national de coordination de la sécurité des Jeux olympiques de la jeunesse (CNS JOJ) tabitinii kabaru oo e communiqué resmiijo.
Tampere nde waɗii e sahaa heblaade carburant
E ko communiqué mo siirtinaa ñalawma alat 1er novembre holli, aksidaaŋ oo waɗii e sahaa nde laanaaji ɗiɗi ɗii njeyaa e golle heɓnugol carburant.
Ndee tampere addii maayde gendarme gooto e gaañugol nayo, ɗoon e tato ɓe ngonka cellal maɓɓe ena tiiɗi.
Haa jooni, no aksidaaŋ oo waɗiri anndaaka tawo, tee inɗe yimɓe ɓe heɓii tampere ndee siirtinaaka.
Ƴeewtagol udditaama ngam anndude daliilu aksidaaŋ
Ƴeewtagol udditaama e jaawngol ngam laaɓtinde daliiluji aksidaaŋ oo e no o waɗiri.
Minis de l'Intérieur et de la Sécurité publique, mo woni kadi président CNS JOJ, neldii ɓernde mum mettuɗo e musiɓɓe gendarme mo maayii, Gendarmerie nationale e kala Forces de défense et de sécurité.
O ɗaɓɓanii kadi gendarmeji ɓe gaañaama ɓee cellal e jaawngol.
Communiqué resmiijo oo siifaama e commissaire de police Mamadou Diouf, e innde Cellule communication média CNS JOJ.
Ndee tampere umminii naawne mawnde e hakkunde doole kisal. Ƴeewtagol ena jokka ngam tabitinde ko addi aksidaaŋ oo. Alla yurmo mo maayii, tee hokku gaañaaɓe ɓee cellal e jaawngol. Aamiin.
Fouta TV - L'information au service des citoyens.
