Emigrasioŋ ngal yamiraaka : Senegaalɓe 914 nangaama e Gambie e nder lewru gooto
Hooreeɓe Gambie nangii yimɓe 1 786 ɓe eɓɓanoo yahde e emigrasioŋ ngal yamiraaka, hakkunde 1er octobre e 2 novembre 2026. E hakkunde maɓɓe, ena woodi Senegaalɓe 914. E ko Département gambien de l'immigration (GID) humpitiri ñalawma talaata 10 novembre, operasioŋaji 45 mbaɗaama e ndee sahaa, tee yimɓe ɓurɓe 40 nangaama e sikkiiji jeyde e renndooji passeurɓe.
Senegaalɓe ɓurii heewde e hakkunde ɓe nangaama
E ko limgal GID holli, Senegaalɓe ko ɓe ɓuri heewde e hakkunde emigranɓe ɓe nangaama, tawa ɓe limi 914, ko woni 51,2 % e limgal fof.
Caggal maɓɓe, ena woodi Gambiɓe 740 (41,4 %), Gineɓe 68 (3,8 %) e Maliɓe 36 (2 %). Yimɓe heddiiɓe 28 ummii e leɗɗe ceertuɗe.
Worɓe ko ɓe ɓuri heewde e hakkunde ɓe nangaama, tawa ɓe limi 1 590, e rewɓe 196.
Tuumaaɓe ɓurɓe 40 nangaama e haala passeurɓe
E nder ɗee operasioŋaji, sarwiisiji emigrasioŋ Gambie ɓeydinii golle maɓɓe ngam haɓde e renndooji ɗi ena sikkitaa eɓɓata yahdu emigrasioŋ ngal yamiraaka.
Yimɓe ɓurɓe 40 ɓe tuumaa e jeyde e ɗee golle nangaama e sahaa nde limgal ngal ƴeewtaa.
Ɗee limgal ena holli no emigrasioŋ ngal yamiraaka heewiri e hakkunde Senegaalɓe e leydi Gambie, ndi woni gooto e nokkuuje iwdi walla rewde ngam yahde e laabi maayo Atlantik.
Fouta TV - L'information au service des citoyens.
