JOJ Dakar 2026 : Khalil Cissé ena sikkitaa wonde ko kanko maa ɗow golle artis e sirla udditgol
E sahaa nde udditgol Jeux olympiques de la jeunesse (JOJ) Dakar 2026 ɓadii, ñalawma asewe 31 octobre e Stade Abdoulaye Wade Diamniadio, innde direktëër artistik sirla ndee ena ummina naamne. E ko Seneweb humpitiri, Senegaaljo Khalil Cissé, mo anndiraa e innde Xalil, ena sikkitaa wonde ko kanko suɓaa ngam ɗowde golle artis. Kono ndee humpito tabitinaaka tawo e laawol resmiijo.
Sirla ngam hollude Afrik e noonee kesere
Sirla udditgol JOJ heblaama gila 18 h 30 haa 20 h, ngam darajinde aadaaji Senegaal e ceertuɗe aadaaji Afrik.
Comité d'organisation des JOJ (COJOJ) suɓii heblaade golle artis e nder Senegaal, ngam ɓeydude darnde artisɓe leydi e hokku Afrik fartaŋke ngam haalude taariki mum.
E ɗowgol Khady Niang, hooreejo cérémonies, Adama Diop maa ɗow mise en scène. Sirla ndee ena ɗaminaa renndinde yimɓe 11 000, ɗoon e dansoɓe 700.
Khalil Cissé, sosotooɗo mo darajinta Made in Sénégal
Khalil Cissé, designer, annduɗo fannu kolte e heblooɗo sirlaaji, ena anndiraa e golle mum ngam darajinde kreativite Afrik e ganndal artisɓe Senegaal.
O anndiraa kadi e hesɗitinde kolte aadaaji no wax e leppi, e porogaraamji aadaaji no marché kreatif Jaba e sirla « Baalu Kër ».
Ganndal mum ena jahdi e faandaare heblooɓe JOJ ngam hollude Senegaal e noonee kesere, tawa aadaaji, teknolosi e art ena renndinaa.
Kono, COJOJ tabitinaani tawo e peñcu wonde Khalil Cissé suɓaama ngam ɗowde golle artis sirla ndee.
Ndee sirla taariki, nde waɗetee laawol aranɗol e leydi Afrik, maa won fartaŋke mawnde ngam darajinde artisɓe, sosotooɓe e jawdi aadaaji Senegaal e yeeso aduna fof.
Fouta TV - L'information au service des citoyens.
