CROUS Matam : Dossierji 6 437 jaɓaama, Barka Cissé laaɓtinii no nangugol gollotooɓe waɗirtee
Centre régional des œuvres universitaires et sociales (CROUS) Matam jaɓii dossierji 6 437 haa timmugol dépôt ñalawma alarba 28 octobre 2026. E yeeso ɗuuɗal ɗaɓɓotooɓe golle, direktëër zeneral mum, Barka Cissé, laaɓtinii no cuɓagol gollotooɓe waɗirtee, caɗeele budget e faandaaji nangugol yimɓe e ndee mahre université hesere.
Ɓurɓe 6 400 ɗaɓɓotooɓe golle
E ko Barka Cissé holli, dossierji 2 228 ɗaɓɓitaama ngam golle ɗe cokli ganndal spesialise, tawa 4 209 ɗaɓɓitaama ngam golle ɗe coklaani kwalifikasioŋ spesialise.
Gila subaka law, yimɓe ujunnaaje renndinoo e CEDEPS Matam ngam hokkude dossierji maɓɓe. Yoga e maɓɓe ɓenndinii jemma e nokku ngal.
Direktëër zeneral oo hollii wonde ndee ɗuuɗal ena holli no sokla golle mawniri e diiwaanu Matam.
Mooɓugol CV ngam nangugol gollotooɓe seeɗa seeɗa
CROUS suɓii mooɓde CVji ɗaɓɓotooɓe golle, ngam huutoraade ɗi e sahaa nde sokla gollotooɓe waɗi.
Barka Cissé wi'i : « Min heblii laawol kesol nangugol gollotooɓe, ngal Senegaalɓe keewɓe anndaani : mooɓugol CVji ngam soklaaji garooji. »
Dossierji ɗii maa ceerndire e fannuuji ganndal, hade comité ƴeewtaade ɗi. Ɓe njogii profilji moƴƴi maa nodde ngam entretien.
O hollii wonde CROUS ena waawi fuɗɗude e gollotooɓe 300 haa 400, walla ɓurɓe ɗum, so budget e conseil d'administration njamiri.
Ŋakkere budget leeltinii digitalisasioŋ
Barka Cissé laaɓtinii wonde budget CROUS heɓaaka tawo, ɗum waɗi haa dossierji toppitetee e juuɗe yimɓe, e ballal volontaires.
Kono o tabitinii wonde digitalisasioŋ ko gooto e faandaaji mawɗi ndee mahre.
Nangugol gollotooɓe maa fuɗɗu seeɗa seeɗa, rewde e udditgol sarwiisji université e heɓugol infrastruktuurji.
E miijo direktëër zeneral oo, faandaare ko sosde golle juutɗe, tawa ganndal e soklaaji CROUS ena njogaa e yeeso. O yiɗi ɓurɗum wallude sukaaɓe Fuuta ngam ɓe keɓa golle e ɓe ngalaaɓa e diiwaanu maɓɓe.
Fouta TV - L'information au service des citoyens.
