JOJ Dakar 2026 : Mamadou Djigo teddinii Macky Sall, noddii ngam darnde mum e taariki JOJ anndee
E sahaa nde udditgol Jeux olympiques de la jeunesse (JOJ) Dakar 2026 ɓadii, Mamadou Djigo, directeur général ɓennuɗo Agence nationale de l'aménagement du territoire e hooreejo APR, teddinii Président ɓennuɗo Macky Sall. O siftinii darnde mum e heɓnugol JOJ e Senegaal, tee o noddii ngam golle laamu ɗe fuɗɗaa e sahaa hooreeɓe ɓennuɓe njokkee darajineede.
« Taariki ena jogii siftorde mum »
E sahaa nde Senegaal heblii jaɓɓude joowe olimpik aranooje e Afrik ñalawma 31 octobre 2026, Mamadou Djigo siftinii wonde candidature Senegaal jaɓaama 8 octobre 2018, e sahaa laamu Macky Sall.
JOJ ɗi heblaanoo e 2022 leeltinaama haa 2026 sabu ñawdu Covid-19.
E miijo mum, hay so Macky Sall heddaani e laamu e sahaa udditgol JOJ, ɗum fotaaki waɗde haa darnde mum e heɓnugol joowe ɗee yejjitee.
O wi'i : « Taariki ena jogii siftorde mum, tee hay baylugol laamu waawataa momtude darnde mo fuɗɗi anniya mawnde. »
JOJ e yeesoɓtere infrastruktuurji Senegaal
Mamadou Djigo hollii wonde JOJ Dakar 2026 wonaa joowe sport tan, kono ko njuɓɓudi mawndi nde renndini transport, kisal, hoɗɗingol yimɓe e mahgol infrastruktuurji.
O jokkondirii ɗum e Plan Sénégal émergent (PSE) e Plan national d'aménagement et de développement territorial (PNADT).
O inniri mahɗe no AIBD, TER, BRT, Stade Abdoulaye Wade, Dakar Arena e pôle urbain Diamniadio, ɗe o jogii wonde ena walli yeesoɓtere Senegaal.
Fartaŋke ngam hollude jawdi Senegaal
E miijo mum, JOJ maa won fartaŋke ngam hollude aduna jawdi aadaaji e taariindi Senegaal.
O siftinii Niokolo-Koba, Dindéfélo, Djoudj e delta du Saloum, wondude e jawdi remugol, mine, petorol e gaz.
O jogii wonde ndee sirla ena waawi ɓeydude investismaaji, turism e gollondiral internasional.
Noddingol ngam darajinde golle hooreeɓe ɓennuɓe
Mamadou Djigo noddii Président Bassirou Diomaye Faye e hooreeɓe laamu hannde ngam ɓe anndina darnde Macky Sall e heɓnugol JOJ.
O wi'i : « Anndinde moƴƴere hooreejo ɓennuɗo ustataa darnde mo lomtini mo. Ɗum ena ɓeyda teddungal République. »
O yettii kadi gouvernement hannde, Comité d'organisation e partenaires ɓe ngollata ngam moƴƴinde joowe ɗee.
Jeyaaɗo APR oo tabitinii hoolaare mum e Macky Sall. Ndee deklarasioŋ ena hollira miijo mum politik e dow golle ɗe mbaɗaa e sahaa laamu mum.
E nde JOJ Dakar 2026 udditotoo, Mamadou Djigo ɗaɓɓitii yo ndee sirla won daraja Senegaal e Afrik, tawa golle hooreeɓe leydi ɓennuɓe e hannde ena anndee e taariki.
Fouta TV - L'information au service des citoyens.
