LFR 2026 : Amadou Bâ reentinii rapport depiteeɓe, tee o noddii ngam huutoraade « VAR » yeeso gouvernement
Séance plénière nde ƴeewtanoo projet de loi de finances rectificative (LFR) 2026 addii yeddondiral tiiɗngal hakkunde gouvernement e depiteeɓe, ñalawma talaata 3 novembre, e Assemblée nationale. Caggal nde gouvernement yeddii yoga e humpitooji rapport Commission des finances, depitee Amadou Bâ reentinii golle ɗe mbaɗaa e commission.
Yeddondiral e dow hospitaalji e coggu nguurndam
Amadou Bâ yeddii tuumaaji gouvernement e dow wonde rapport oo ena jogii humpitooji ɗi peewaani.
O hollii wonde porojeeji hospitaalji Mbour, Kaolack, Bakel, Ziguinchor e Saint-Louis kaalteraama e jeewte parlementaire.
E ko o wi'i, depiteeɓe umminnoo naamne e dow ŋakkere ceede yoɓugol ɗe ndokkaa e LFR 2026, wondude e majjere limooje budget ɗee e projet de budget initial 2027.
O teeŋtinii kadi soklaaji yimɓe e dow ceede renndo e ɓeydude coggu kuutorɗe.
O wi'i : « Reende mbaawka soodugol Senegaalɓe e haɗde coggu kuutorɗe ɓeydude ko huunde mawnde no feewi. »
« Min mbaawi huutoraade VAR »
Ngam laaɓtinde yeddondiral e dow haalaaji ɗi mbaɗaa e commission, président de séance eɓɓii huutoraade nataali e nanngitte video e sawtu ngam hollude ko waɗnoo.
O wi'i : « Min mbaawi yaltinde VAR, min kollira ɗoo e ndee suudu ko waɗnoo e commission. »
Yeddondiral ngal njowitii kadi e fonds spéciaux. Amadou Bâ siftinii wonde depitee gooto e opposition umminnoo naamnal e dow ɗowgol ɗee ceede rewde e loi organique.
O yeddii gouvernement ko o tuggii e ñaawoore Conseil constitutionnel, tawa, e miijo mum, o jaabaaki naamne mawɗe ɗe depiteeɓe umminnoo.
O reentinii : « On mbaawaa waylude maana haalaaji amen. Hoto on kadi waylu maana haalaaji men. »
Ɗee jeewte kollii yeddondiral mawngal hakkunde gouvernement e depiteeɓe e dow faandaaji budget e no golle Commission des finances siirtirtee.
Fouta TV - L'information au service des citoyens.
