PLFR 2026 : Cheikh Diba reentinii goonga budget, tee o jaɓii ŋakkere milyaar 451 FCFA

Yeddondiral e dow laaɓal budget

E jaabawol mum e depitee Amadou Ba, Cheikh Diba siftinii wonde gouvernement addinoo lois de finances rectificatives ɗiɗi e 2025, ɗiɗaɓere ndee e décembre, ngam fotnude budget e baylugol ceede ɗe naatata e ɗe njaltata.

E miijo ministre oo, ɗee bayle ena kollira anniya laaɓal e toppitagol ceede laamu.

O tuggii kadi e article 47 loi organique relative aux lois de finances (LOLF), tawa o siftinii sarɗiiji ƴeewtagol e peewnitugol budget, ɗoon e loi de règlement.

Ceede juuti ɗe heɓaa ɓuraani ko ɗaminaa

Cheikh Diba jaɓii wonde takseji kesɗi ɗi eɓɓaa e porogaraam yeesoɓtinde ekonomi e renndo mbaawataa addude ceede ɗe ɗaminanoo.

Gouvernement ɗaminanoo heɓde milyaar 762 FCFA, kono haa sakkitorde septembre 2026, ko milyaar 173,3 FCFA tan mooɓaa.

E ko ministre oo holli, ceede ɗee ena mbaawi yahde haa milyaar 311 FCFA e sakkitorde hitaande, so faandaaji ɗi keddii timminaama. Ɗum waɗata ŋakkere milyaar 451 FCFA e ko ɗaminanoo aranɗe.

O wi'i : « Min mbaawataa heɓde milyaar 762. Min maa heɓu milyaar 311 so faandaaji ɗi min waɗi haa sakkitorde hitaande timminaama. »

Ministre oo yeddii daliiluji depiteeɓe

Hay so ŋakkere ndee ena woodi, Cheikh Diba jogii wonde ceede ɗe heɓaa ena njogii nafoore mawnde, tee ɗe wallii finansde golle gouvernement keewɗe.

E yeeso yeddondiral depiteeɓe, o mettii ko naamnal laaɓal budget huutortee, e miijo mum, ngam yeddude projet oo.

O wi'i : « Ko naamnal laaɓal budget tan on kuutortoo ngam yeddude faandaare e porojee mawɗo hono projet de loi de finances rectificative. »

Ɗee jeewte kollii yeddondiral hakkunde gouvernement e depiteeɓe e dow hoolaare limooje budget e laabi finansde soklaaji leydi e hitaande 2026.

Fouta TV - L'information au service des citoyens.