Emigrasioŋ ngal yamiraaka : Mamadou Manizor Thiam reentinii e dow ŋakkere hoolaare sukaaɓe e caɗeele politik golle
E yeeso jokkugol emigrasioŋ ngal yamiraaka e Senegaal, spécialiste Mamadou Manizor Thiam noddii ngam ƴeewtaade politik heɓugol golle e wallugol sukaaɓe. E miijo mum, caɗeele ekonomi, ŋakkere fartaŋkeji e njaltudi porogaraamji laamu ɗi ŋakki ena ɓeyda yiɗde yahde e leɗɗe janane e hakkunde yoga e sukaaɓe.
« So hoolaare alaa, haɗde yimɓe yahde ena saɗa »
E miijo Mamadou Manizor Thiam, haɓde e emigrasioŋ ngal yamiraaka fotaaki dartude tan e semmbinde reende maayo e leƴƴinde renndooji passeurɓe.
O sikki wonde ena sokla safaaraade caɗeele ekonomi e renndo ɗe mbaɗata yoga e sukaaɓe njogora nguurndam maɓɓe ngam yahde Europe.
« Fotaani jokkude waɗande ɓe alkawuuji ɗi ngalaa goonga », ko ɗum o reentiniri, tawa o noddii laamu ngam waɗde alkawuuji ɗi mbaawi timmineede e safaaraaji ɗi njahdata e soklaaji yimɓe.
Ƴeewtude njaltudi ceede ɗe finansaa
Mamadou Manizor Thiam naamnii kadi e dow njaltudi porogaraamji keewɗi ɗi mbaɗaa ngam finansde e wallude sukaaɓe.
E miijo mum, moƴƴugol ɗee porogaraamji fotaaki ƴeewteede tan e limgal ceede ɗe yoɓaa, kono ɓurɗum e mbaawka maɓɓe sosde golle ɗe ngaddata nafoore e gollal duumotoongal.
O ɗaɓɓitii semmbinde suivi-évaluation, moƴƴinde toppitaade ceede e ɓeydude jaabawol e timmingol porojeeji.
O siftinii kadi nafoore ekonomi informel e sokla semmbinde secteur privé ngam sosde fartaŋkeji golle.
Semmbinde formation professionnelle e remugol
Goɗɗum ko moƴƴinde formationaji ngam ɗi njahda e soklaaji marse golle.
Mamadou Manizor Thiam wasiyii ɓeydude janngugol teknikal e professionnel, ɓurɗum e diiwaanuuji, ngam sukaaɓe heɓa ganndal e mbaawka ɗi ɓe mbaawi huutoraade e golle.
E fannu remugol, o noddii ngam ɓennude finansde porojeeji tan, tawa caɗeele heɓugol kuutorɗe, baylugol jawdi e no remete jaayirtee ena ƴeewtee.
E miijo spécialiste oo, faandaare ko mahde golle ekonomi ɗe mbaawi jokkude e heɓnude sukaaɓe fartaŋkeji nguurndam, ngam ustude daliiluji ɗi mbaɗata ɓe naata e yahdu emigrasioŋ ngal heewi kulol.
Fouta TV - L'information au service des citoyens.






