JOJ Dakar 2026 : Lampadaarji solaare 1 200 aafaa e Saly e Diamniadio, e coggu miliyaar 1,5 FCFA
E sahaa nde udditgol Jeux olympiques de la jeunesse (JOJ) Dakar 2026 ɓadii, Agence nationale pour les énergies renouvelables (ANER) humpitii wonde lampadaarji solaare 1 200 aafaama e Saly e Diamniadio. Ɗee kuutorɗe, ɗe coggu mum hewti miliyaar 1,5 FCFA, faandii ngam ɓeydude jayngol e laabi e semmbinde kisal yimɓe e delegasioŋaji.
Golle ɗee timminaama e balɗe 25
E ko direktëër zeneral ANER, Thierno Alia Mbengue, holli, golle ɗee timminaama e balɗe 25 tan, e nder heblaade JOJ Dakar 2026, ɗi mbaɗetee gila 31 octobre haa 13 novembre 2026.
E Diamniadio, ƴeewtagol jemma waɗaama wondude e délégué général Me Moussa Diop e teeltaaɓe Comité d'organisation des Jeux.
Ɗum wallii ngam ƴeewtude no lampadaarji ɗii ngollirta e laabi mawɗi e sara nokkuuje sport.
Golle toppitagol ɗee kuutorɗe kadi heblaama ngam ɗe njokka jayngol e sahaa JOJ.
Porogaraam nasional lampadaarji 303 000
Ɓaawo JOJ, ndee golle ena naata e Programme national d'éclairage public solaire, mo fuɗɗaa e hitaande 2019.
E ko Thierno Alia Mbengue holli, fannu tataɓo porogaraam oo ena waɗi aafugol lampadaarji 303 000 e Senegaal fof, e coggu ɓadii miliyaar 390 FCFA.
Faandaare porogaraam oo ko ɓeydude jayngol e nokkuuje renndo, semmbinde kisal yimɓe e yaajnude huutoraade enerjiiji kesɗitotooɗi.
Lampadaarji solaare ɗi aafaa e Saly e Diamniadio ena ɗaminaa wonde ɗi maa njokku wallude yimɓe nokkuuje ɗee, hay caggal timmugol Jeux olympiques de la jeunesse.
Fouta TV - L'information au service des citoyens.
