
Ndimaagu cellal : Institut Pasteur Dakar ena yaawtina sosgol vaksen e kesamhesamaaji haa 2030
Institut Pasteur de Dakar (IPD) ena yiɗi semmbinde ndimaagu cellal Senegaal e Afrik, rewrude e sosgol vaksen e leydi, ƴeewtagol sians e kesamhesamaaji teknoloji. E udditgol édition nayaɓol Dakar Epidemics Forum, ñalawma talaata 17 novembre 2026, administrateur général mum, Dr Ibrahima Socé Fall, hollii faandaaji mawɗi ɗi kurum ngal eɓɓi haa 2030.
Sosgol vaksen nyaw fièvre jaune fuɗɗitaama
E hakkunde yeesoɓtere nde hollinaa, sosgol vaksen ngam reentinde nyaw fièvre jaune fuɗɗitaama caggal duuɓi keewɗi ɗi golle ɗee dartinoo.
Institut oo sosii kadi test diagnostic rapide ngam yiytude nyaw oo ko yaawi, e ɓeydude mbaawka reentinagol e jaabaade kulol epidemiji.
« Sians ena addana renndo safaaraaji e caɗeele mum, tee ena jokka semmbinde sistemji cellal », ko ɗum Dr Ibrahima Socé Fall haali.
Kurum ngal ena yiɗi kadi ɓeydude huutoraade intelligence artificielle (IA) e golle mum ƴeewtagol e sosgol safaaraaji cellal.
Akademi ngam formation e kesamhesamaaji
E nder strategii mum, Institut Pasteur de Dakar ena eɓɓa udditde Global Health and Innovation Academy, kurum kesum ngam formation, cellal aduna e kesamhesamaaji.
Ndee eɓɓoore ena faandii janninde e heblaade siansɓe e teknisienɓe hesɓe ngam jaabaade soklaaji Afrik.
Haala doole bakteriiji e nyawji ɗi njogata ngam salde ñaawndugol antimicrobiens ena jeyaa kadi e hakkunde haalaaji mawɗi ɗi jeewtaa e édition nayaɓol Dakar Epidemics Forum.
Semmbinde gollondiral e rewindo cellal
E miijo El Hadj Ass Sy, président du conseil de fondation Institut Pasteur de Dakar, ndimaagu cellal foti tuggude e gollondiral tiiɗngal hakkunde leɗɗe, ƴeewtooɓe sians e kurumji cellal.
« Ɗum wonaa ndimaagu e seerndugol hoore. Ko ndimaagu e gollondiral », ko ɗum o teeŋtini.
O hollii kadi nafoore rewindo cellal e nder renndo, tawa yiytugol epidemiji ko yaawi foti fuɗɗude gila e galleeji, gure e nokkuuje cellal ɗe ɓadii yimɓe.
E yeeso kulol caɗeele cellal kese, El Hadj Ass Sy noddii ngam waylude alkawalji e golle goongɗe, ngam semmbinde mbaawka Afrik e reentinagol e jaabaade epidemiji e laawol duumotoongol.
Fouta TV - L'information au service des citoyens.





