Hépatite B e Senegaal : Ɓurɓe 1 000 yimɓe toppitaama e caahu, projet SEN-B ɗaɓɓitii cellal ngam kala neɗɗo

Ɓurɓe 1 000 ñawɓe toppitaama e caahu

Projet SEN-B ena renndina ɗaɓɓitagol ganndal, reengol yimɓe e toppitagol cellal.

Ɓe heɓata e caahu konsiltasioŋaji, ƴeewtagol ƴiiƴam, ƴeewtagol virus e ɓandu, échographie e lekkiiji ɗi potani ñawdu maɓɓe.

E ko Pr Moussa Seydi, hooreejo Service des maladies infectieuses et tropicales e hôpital Fann, holli, coggu toppitagol neɗɗo gooto ena waawi hewtude 300 000 FCFA.

Projet oo heɓii kadi njuɓɓudi moƴƴundi e haɗde virus hépatite B iwde e yumma yahde e ɓiɗɗo. Haa jooni, alaa heɓugol virus e ɓiɗɗo ngal humpitaama e hakkunde ɓe njeyaa e ndee wallitaare.

Caɗeele finans ngam jokkude golle

Professeur Gilles Wandeller, iwɗo Université de Berne, hollii wonde projet oo ena jogii budget hitaande ɓadii 200 000 euros, ɗum ko miliyoŋ 131 FCFA.

Kono, ɗee ceede yonaani ngam toppitade ɓurɓe 1 000 ñawɓe e jokkude ɗaɓɓitagol ganndal haa hitaande 2030.

Hooreeɓe projet oo ena ngiɗi heɓde partenaires financiers goɗɗe ngam semmbinde golle.

Ɗaɓɓitgol lekki ténofovir e caahu

Professeur Modou Oumy Kane, koordinaatoor Programme national de lutte contre les hépatites, ɗaɓɓitii yo lekki ténofovir, mo huutortee e toppitagol hépatite B, hokkire e caahu.

Hannde, boowal lekki oo ena soodetee e 5 000 FCFA e Senegaal, ɗum woni caɗeele ceede e ñawɓe ɓe cokli toppitagol juutngol.

O hollii wonde o maa yahdu ndee ɗaɓɓitaare e ministère de la Santé e partenaires, ngam yaajnude projet SEN-B e diiwaanuuji goɗɗi.

Faandaare mawnde ko tabitinde njuɓɓudi SEN-B, semmbinde haɗgol hépatite B e wallude Senegaalɓe keewɓe ngam ɓe keɓa toppitagol cellal tawa caɗeele ceede ngalaa ko haɗata ɓe.

Fouta TV - L'information au service des citoyens.