Modou Bara Gaye, hooreejo keso Dem Dikk : Anndinal ɗo jiiloowo golle mo woni e hakkunde caɗeele gure mawɗe.
Modou Bara Gaye, mo suɓaa ngam wonde Direktëër Zeneral Dakar Dem Dikk (DDD) e dekere Presidãa, jooɗii jooni e hoore gollal mawngal transport publig e nder Dakar e hakkunde ca'e. E nder janngugol makko e laawol jiilugol porozeeji, anndugol makko nokkuuji banlieue Dakar, e humpito makko e golle laamu mawɗo, hooreejo keso DDD oo arii e feere golle laaɓnde : hesɗitinde yaadu yimɓe e feewnude transport, kadi heblaade Dakar ngam Jeux Olympiques de la Jeunesse (JOJ) Dakar 2026.
Modou Bara Gaye : Ngurndan e laawol golle jiiloowo mo jogii humpito e laamu e ƴellitaare leydi
Modou Bara Gaye, jibinaaɗo ñalnde aranere lewru Yarkomaa hitaande 1979 e Yeumbeul, ko gooto e hakkunde mawɓe gollotooɓe Senegaal ɓe njanngugol mum'en e humpito mum'en njokkondiri e fannuuji keewɗi, tawa ɓe njogii gandal tekniki e humpito laawol jiilugol golle laamu.
O heɓii baccalauréat scientifique (S2) e lycée Blaise Diagne e hitaande 2001. Caggal ɗuum, o jokkiti janngugol makko e Université Cheikh Anta Diop de Dakar (UCAD), ɗo o heɓi licence e géographie.
Ngam yiɗde makko e feewnugol porozeeji e ƴellitinde nokkuuji, o jokkiti janngugol makko haa o heɓi Master II e Management des programmes et projets de développement e Institut supérieur de développement local (ISDL), wondude e daraja « Très Bien », e not 17,5/20.
Golle ɗe o waɗi ngam timminde janngugol makko ɗe njahdi e laawol heɓugol doole elektirik tawa huutoraama biodiesel e doole naange. Ɗuum hollata wonde, gila e janngugol makko, o joginoo hakkille e dow mahgol kaɓirɗe ɗe njogii nafa e ƴellitaare duumotoonde.
Laawol golle makko : E hakkunde laamu e sukaaɓe
Modou Bara Gaye fuɗɗii naatugol e golle renndo e laamu rewrude e gollal sukaaɓe e wallugol jama'a.
Hakkunde hitaande 2007 e 2010, o waɗii golle Secrétaire général Conseil national de la jeunesse du Sénégal (CNJS). E sahaa gooto oo, o wonnoo kadi Directeur général adjoint e kabine conseil METHODIS.
E lewru Desàmbar hitaande 2010, o naatii e Ministère des Infrastructures, de l'Énergie et des Transports aériens, tawa o woni attaché de cabinet.
Ɗuum woni fuɗɗorde humpito makko e fannu transport. Humpito ngoo udditani mo laawol naatugol e golle mawɗe laamu.
E lewru Suyee hitaande 2011, o suɓaama ngam wonde Ministre-conseiller e sara Presidãa Abdoulaye Wade.
Caggal ɗuum, o naatii e Assemblée nationale, ɗo ɓe o wondunoo e golle cuɓi mo ngam wonde 5ᵉ Vice-président e 14ᵉ législature, hakkunde hitaande 2022 e 2024.
Golle e leydi : Ko ɓurti duuɓi sappo e hoore Yeumbeul Sud
E dow golle ɗe o waɗi e ministeruuji e Assemblée nationale, Modou Bara Gaye heɓii kadi humpito mawngo e laawol jiilugol nokkuure makko.
O suɓaama ngam wonde Meer komiin Yeumbeul Sud e hitaande 2014. Gila ndeen, o waɗii ko ɓurti duuɓi sappo e gollal ƴellitinde nokkuure ndee, feewnude kaɓirɗe jama'a e moƴƴinde ngonka yimɓe.
E nder golle ɗe o waɗi, ina woodi ɓeydude leeral laawol e nokkuuji jama'a, tawa ɓe waɗii 553 leeral elektirik.
O wallii kadi e ɓeydude kaɓirɗe cellal, ko wayi no poste de santé e maternité Cheikh Sidaty Fall.
E fannu janngugol e sport, ɓe mahii stade municipal mo jogii gazon synthétique, collège e lycée ngam wallude sukaaɓe e janngooɓe nokkuure ndee.
Ɓe mahii kadi centre commercial rewrude e jokkondiral hakkunde laamu e fannu privé, ngam ɓeydude ceede naatooɗe e komiin oo e cemmbinde gollal njulaagu.
Humpito makko e Yeumbeul Sud waɗii o anndii no feewi caɗeele ɗe yimɓe banlieue Dakar njahdata e mum'en kala ñalawma, haa tawi ko ɗoon woni caɗeele transport e yaadu yimɓe.
Laawol golle e Dakar Dem Dikk : Jokkondiral transport, dijital e JOJ Dakar 2026
Modou Bara Gaye, hooreejo keso Dakar Dem Dikk SA, naatii e golle ɗee e sahaa nde fannu transport e Dakar jogii caɗeele mawɗe ɗe poti ñawndee.
Laawol golle makko ina jokkondiri e Vision Sénégal 2050, tawa o fawii hakkille e dow fannuuji tati mawɗi : jokkondirde transport keewɗo, udditde nokkuuji ɗi transport heɓata saɗɗii, e ɓeydude huutoraade teknolosi dijital.
Fannu arano : Jokkondirde laabi transport
Fannu arano oo ina faami jokkondirde no feewi otooji Dakar Dem Dikk (DDD), Train Express Régional (TER) e Bus Rapid Transit (BRT), tawa CETUD ina waɗa ko haani ngam feewnude jokkondiral ngal.
Ɗuum ina walla yimɓe ngam ɓe mbaawa yaade e nder Dakar e sara mum, tawa ɓe mbaawata waylude transport e laawol hoyɗungol.
Fannu ɗiɗaɓo : Udditde nokkuuji transport
Fannu ɗiɗaɓo oo ina faami ɓeydude laabi otooji Dakar Dem Dikk haa e nokkuuji kesi ɗi mahiraa e sara Dakar.
Faandaare mum ko wallude yimɓe ɓe njooɗii e nokkuuji ɗi transport heɓata saɗɗii, ngam ɓe mbaawa yahde e golle, e lekkol, e luumo e nokkuuji goɗɗi e jam.
Fannu tataɓo : Dijitalisasyon e teknolosi keso
Fannu tataɓo oo ina faami naatnude laabi kesi ngam yo yimɓe mbaawu yoɓde transport huutoraade telefon mum'en.
O ina yiɗi kadi yo humpito transport, sahaa otooji e laabi ɗi ɗi njahata, heɓee e telefon e sahaa gooto.
E nder ɗuum, kisal humpito e kaɓirɗe dijital, ɗum woni cybersécurité, ina jogii nokkuure mawnde.
JOJ Dakar 2026 : Dakar Dem Dikk e hakkunde heblagol
E dow ɗee golle, ina woodi kadi Jeux Olympiques de la Jeunesse (JOJ Dakar 2026), ɗe Senegal foti jaɓɓude.
Dakar Dem Dikk ina yiɗi jogaade geɗal mawngal e yaadnugol yimɓe e sahaa nde ɗee fijirɗe mbaɗetee.
Ɗum ina jokkondiri e konngol ngol :
« L'Afrique accueille, Dakar célèbre et Dem Dikk transporte. »
E Pulaar :
« Afrik ina jaɓɓa hoɓɓe, Dakar ina waɗa weltaare, Dem Dikk ina yahdina yimɓe. »
Modou Bara Gaye, mo anndiraa e laawol yeewtidugol e yimɓe, hollii gila e fuɗɗoode golle makko wonde o yiɗi jokkondiral moƴƴal hakkunde makko, gollotooɓe Dakar Dem Dikk e dental ɗi ndaranii hakkeeji maɓɓe.
O ina faandaade jiilugol golle ɗee e laawol laaɓngol, goonga e teddinde ko laamu fawii e hoore Dakar Dem Dikk ngam wallude jama'a.
Faandaare mawnde ko hesɗitinde transport publig, hoynude yaadu yimɓe e waɗde Dakar Dem Dikk gollal ngal waawi jaɓɓude caɗeele transport e Senegaal, hannde e janngo.
