Sidya Ture, jeyaaɗo e luulndo, wonnooɗo hooreejo guwernama Gine, suuɗaama Abidjan.

Ko e laawol sakkitiingol, Sidya Ture naati e dambugal juulirde mawnde Riviera Golf, Abidjan, ɗo o woowunoo araade juulde. Oon jeyaaɗo e luulndo, wonnooɗo hooreejo guwernama Gine, maayii Paris ñalnde 25 septaambar ɓennuɗo, tawa o waɗii duuɓi 81. O suuɗaama Abidjan ñalnde alhamisa 8 oktoobar, e nder juulde janaasa nde ɓooyɓe makko e mawɓe siyaasaa Gine heewɓe tawii, ngam sallitaade mo e laawol sakkitiingol. Wonnoo e maɓɓe ko Cellou Dalein Diallo, goɗɗo e mawɓe luulndo Gine.

Oon wiyii: « Sidya Ture wonnoo ko neɗɗo hakkilantaajo, heɓnooɗo ganndal e humpito keewɗam e golle laamu Kodduwaar, tawi o yiɗi naftinde ɗum Gine. O fuɗɗinii waylooji fof ɗi paandaannoo artirde hoolaare e Gine, e artirde leydi men e laawol ɓamtaare. »

Lansana Kouyaté, kanko ne wonnooɗo hooreejo guwernama, tawii e janaasa oo. O siftinii sahaaji caɗɗi ɗi o renndunoo e maayɗo oo, tawi ɗuum ɓadondirii ɓe. O wiyii: « Men ngonnoo ko e oto mo balaaje mbaawataa naatde, tawi men paɗaama e mitrayet. Balaaje ɗee naataano, kono men nana “tik-tak” ɗee… So a renndii e neɗɗo e ɗuum, seerugol makko e aduna ene metta ma… »

Hay so laamɓe Gine njiɗnoo Sidya Ture suuɗee e Gine, ɓeynguure makko suɓii yo o suuɗe e Kodduwaar. Ko e ndeen leydi hooreejo lannda Union des forces républicaines (UFR) oo waɗi ɓurɗum e golle makko e nder laamu. Ko toon kadi o heɓi moolorgal, ko atii duuɓi nay, caggal nde o riiwaa e suudu makko e Konakiri.

Fodé Baldé, wonnooɗo hooreejo humpitorgal makko, haaltii hannde wonde neɗɗaagu makko e leydi janane ndii sattinoo mo. O wiyii: « Ko wa'i no jimol ngol timminaaka. Sidya Ture heddii e yiɗde ruttaade Gine, ɗo o yiɗnoo jokkondirde e remooɓe. E gasirde yontere kala, men njahata e wuro, ɗo o yahata toraade Alla e genaale jinnaaɓe makko. »