Ñalawma Aduna ngal Haɗde Ñaawgol Wareede : Seydi Gassama noddii Diomaye Faye ngam o walla Mbayang Diop.
E ndee ñalawma aduna ngal waɗetee ngam haɗde ñaawgol wareede, ngal waɗetee hannde asewe 10 octobre, Seydi Gassama noddii Hooreejo Leydi Senegaal, Bassirou Diomaye Faye, ngam o naata e haala Mbayang Diop, debbo mo ɓe nangi e Saudi Arabia, mo woni e kaso e nder padde ñaawgol wareede mum gila duuɓi ɓurɗi sappo (10).
E nder mesas mo o siiwti e ndee ñalawma, direktër exécutif Amnesty International Sénégal, Seydi Gassama, hollii sokla mum mawɗo e dow ngonka Mbayang Diop, debbo Senegaal mo woni e caɗeele e Saudi Arabia.
O noddii Hooreejo Leydi Senegaal ngam o naata hoore mum tigi e ndee haala, ngam etagol dandude nguurndam Mbayang Diop.
O winndii wi'i :
« Min noddii Hooreejo Leydi Bassirou Diomaye Faye ngam o naata hoore mum tigi e ndee haala, ngam dandude Mbayang Diop e wareede nde ɓe mbi'i ena ɓadanii mo. »
Mbayang Diop ñaawaama wareede e lewru avril 2017, sabu ɓe tuumii mo e warugol debbo gorko mo o gollanata.
E ko Seydi Gassama wi'i, Mbayang Diop ena waawi tawde heɓii tampere e bonanɗe e juuɗe oo debbo hade ndee haala waɗde.
Hooreejo Amnesty International Sénégal naamnii kadi no ñaawgol Mbayang Diop waɗiraa, e so hakkeeji mum ɗowraa no haaniri e yeeso sara'a.
O teeŋtinii wi'ude :
« O heɓaani ñaawgol peewngol, ngal ɗowraa e goonga e hakkeeji mum. »
E ndee ñalawma aduna ngal waɗetee ngam haɓde e ñaawgol wareede, Seydi Gassama waɗii haala Mbayang Diop huunde mawnde e noddaango mum.
O ɗaɓɓitii Hooreejo Leydi Senegaal, Bassirou Diomaye Faye, ngam o naata hoore mum tigi e ndee haala, o huutora bawɗe mum e jokkondiral hakkunde Senegaal e Saudi Arabia, ngam etagol dandude nguurndam Mbayang Diop.
