Lekkoolji laamu : Guy Marius Sagna yeddii ŋakkere ceede, tee o noddii gouvernement ngam safaaraade caɗeele ɗee
Depitee Guy Marius Sagna reentinirii e dow caɗeele ceede ɗe lekkolji élémentaire laamu heɓata e Senegaal. Tuggude e jaabawol ministre de l'Éducation nationale e naamnal parlementaire, o yeddii ŋakkere budget golle lekkolji, tee o ɗaɓɓitii yo laamu hokku kuutorɗe e ceede ɗe soklaa ngam tabitinde janngugol caahu.
Jinnaaɓe ɗaɓɓitaama ceede ngam finansde évaluations
E Louga, yoga e lekkolji élémentaire ena sikkitaa wonde ɗi ɗaɓɓitii jinnaaɓe 200 FCFA e hitaande ngam kala janngoowo, ngam yoɓde kopiyugol ɗereeji examens.
E jaabawol mum, ministre de l'Éducation nationale tabitinii wonde lekkolji Artillerie Nord e Marbatt ɗaɓɓitinoo ndee ceede e nanondiral jinnaaɓe.
O laaɓtinii wonde direkteerɓe lekkolji ɗii ngalaa budget golle, tee ɓe heɓataa ceede inscription, sabu ɗum yamiraaka e lekkolji élémentaire laamu.
Yoga e lekkolji ena ŋakki kadi imprimanteji, photocopieuseji, kaayit e encre. Kono, ministre oo tabitinii wonde hay janngoowo gooto haɗaaka naatde e évaluations sabu yoɓaani ceede.
Guy Marius Sagna ɗaɓɓitii ɓeydude ceede lekkolji
Depitee oo siftinii wonde arrêté 27 mars 2023 tabitinii inscription caahu e lekkolji préscolaire e élémentaire laamu.
E ko o holli, gouvernement humpitinoo ceede kompansasioŋ ngam lekkolji élémentaire laamu 9 002. Kono, o wi'i wonde o heɓii seedeeji e yoga e lekkolji ɗi holli wonde ɗi heɓaani hay yoɓugol gootol.
Guy Marius Sagna noddii hooreeɓe laamu ngam ɓeydude finansde lekkolji laamu, ɓurɗum ɗi jannginta sukaaɓe galleeji ɗi ngoni e caɗeele ceede.
O teeŋtinii nafoore reende janngugol laamu caahu e moƴƴol, tawa ceede golle lekkolji ɗii fotaaki waɗeede doŋngal e dow jinnaaɓe janngooɓe.
Fouta TV - L'information au service des citoyens.
