Coupe d'Afrique nde waɗetee kala duuɓi ɗiɗi : Me Augustin Senghor hollii miijo mum e dow ndee haala.
Confédération Africaine de Football (CAF) ena miijoo ngam Coupe d'Afrique des Nations (CAN) fuɗɗitaade waɗeede kala duuɓi ɗiɗi. Ndee miijo, Me Augustin Senghor jaɓii nde no feewi. Arano hooreejo Fédération Sénégalaise de Football (FSF) oo hollii wonde o jaɓii ndee feere hesere, tee o noddii kadi yimɓe e ardiiɓe football Afrik ngam ɓe walla ndee ɗaɓɓitaare.
« E leydi Cap-Vert, e sara Konferans stratejik mo Confédération Africaine de Football (CAF), hooreejo mum Patrice Motsepe hollii miijo mum ngam Coupe d'Afrique des Nations (CAN) fuɗɗitaade waɗeede kala duuɓi ɗiɗi.
Ngam nafoore football Afrik, weltaare yiɗɓe football e ngam waɗde haa ceede amen ngona e jam, en poti wallude ndee ɗaɓɓitaare », ko ɗum Me Augustin Senghor winndi e laylaytol X, ñalawma asewe oo.
CAN kala duuɓi nay : Feere nde CAF yiɗno waɗde
E lewru décembre 2025, hooreejo CAF, Patrice Motsepe, hollino wonde Coupe d'Afrique des Nations maa waylu no waɗetee, ngam nde fuɗɗaade waɗeede kala duuɓi nay (4), ɗum woni kompetisioŋ gooto e nder duuɓi nay.
Kono, ndee feere hesere ena waawi wayleede kadi, sabu CAF ena ƴeewta jooni so CAN waawi ruttaade e mbaadi mum aranandi, ɗo nde waɗetee kala duuɓi ɗiɗi.
Patrice Motsepe hollii wonde kala feere ena ƴeewteede
Ñalawma aljuma 9 octobre 2026, hooreejo CAF, mo iwri e Afrique du Sud, teeŋtinii wonde feereji keewɗi ngoni e ƴeewteede.
E hakkunde ɗeen feere ena woodi ruttinde Coupe d'Afrique des Nations e waɗeede kala duuɓi ɗiɗi (2).
O wi'i ɗum e sara konferans stratejik mo CAF waɗi e Cap-Vert.
« Min ngollondirii e dow ndee haala e nder ɗee balɗe cakkitiiɗe. Min ngoni e ƴeewtaade kala feere nde waawi nafaade football Afrik, haa e ruttinde CAN e waɗeede kala duuɓi ɗiɗi. »
Ndee miijo udditii kadi yeddondiral e dow CAN
Caggal lebbi seeɗa tan nde CAF holliino waylugol mawngol e dow kalandiriye Coupe d'Afrique des Nations, ndee miijo hesere waɗii haa yeddondiral fuɗɗitii hakkunde ardiiɓe football Afrik e yiɗɓe mum.
Woɓɓe ena ƴeewta so CAN waɗeede kala duuɓi ɗiɗi ɓuri nafde football Afrik, tawa woɓɓe ena naamna so waylugol feereji ɗii tuumaaji keewɗi waawi heɓde no moƴƴiri.
Ndee haala waɗii kadi haa yimɓe fuɗɗii naamnaade so CAF ena jogii feere laaɓnde e tabitnde ngam yeeso football Afrik, walla so kalandiriye kompetisioŋ ngal maa jokka wayleede.
Haa jooni, suɓaande sakkitiinde waɗaaka tawo, tawa CAF ena jokka e ƴeewtagol feere nde ɓuri nafde football Afrik.
