Budget 2027 : Commission des finances yeddii eɓɓooje budget gouvernement
Ƴeewtagol projet de loi de finances initiale (LFI) 2027 heɓii caɗeele kese e Assemblée nationale. E kawrital ñalawma asewe 7 novembre, Commission des Finances et du Contrôle budgétaire hollii wonde nde jaɓaani eɓɓooje budget ɗe gouvernement addi, ɗoon e ceede ɗe laamu ɗamini heɓde, ɗawre leydi e budgetji kurumji laamu ceertuɗi.
Ceede budget ɗe yeddondiral waɗi e dow majje
Kawrital ngal ɗowaama e Alphonse Sambou, tawa ministre Cheikh Diba e gollondirɓe mum e fannu Budget e Économie njeyii heen.
E budgetji ɗi addaa, ceede Présidence de la République ɗaminaa yahde haa 223,86 miliyaar FCFA, tawa e 2026 ko 204,54 miliyaar, ko woni ɓeydagol 19,32 miliyaar.
E bannge Assemblée nationale, budget mum ena ɗaminaa ustude gila 22,30 haa 21,11 miliyaar FCFA.
Ceede ɗe ɗaminaa ngam Conseil constitutionnel ko 1,50 miliyaar, Cour suprême 4,69 miliyaar, e Cour des comptes 13,07 miliyaar FCFA.
Goonga e laaɓal budget ngoni hakkunde yeddondiral
E nder jeewte ɗee, yoga e jeyaaɓe Commission naamnii e dow nanndondiral limgal ceede e hoolaare prévisionaji finans gouvernement.
Ɓe yeddii kadi ŋakkere yoga e ɗereeji seedeeji, ɓurɗum loi de règlement 2025, nde ɓe njiyata no soklaa ngam ƴeewtude no budgetji ɓennuɗi huutortiraa.
Laaɓtingol ngal wakilɓe gouvernement mbaɗi waawaayi ittude sikkiiji ɗi Commission holli.
E sakkitorde, Commission yeddii kala projetji ɗi addanaa nde ngam ƴeewtagol.
Ndee yeddude waɗii e sahaa nde caɗeele budget ena njokka, caggal yeddude loi de finances rectificative 2026. Golle Assemblée nationale e dow budget 2027 ena ɗaminaa jokkude haa 16 novembre.
Fouta TV - L'information au service des citoyens.
