Yimɓe 60 ɓe ummii e Saint-Louis ngam yahde e tukki emigrasioŋ, dandaaɓe e Espagne caggal balɗe jeegom (6) e dow maayo mawɗo.
Laana pirog gooto, mo rondi yimɓe 60 ɓe ummii e Senegaal ngam yahde e emigrasioŋ, dandaaama jemma asewe oo, e dow maayo mawɗo, sara duunde El Hierro, nde woni e hakkunde duuɗe Canaries, e leydi Espagne. E nder oo laana, ena woodno rewɓe ɗiɗo (2) e sukaaɓe joy (5). Ɗee yimɓe 60 ummiino e Saint-Louis, Senegaal, ngam yahde e Europe, kono ɓe mbaɗii balɗe jeegom (6) e dow maayo mawɗo hade nde ɓe keɓi ballal e juuɗe dandotooɓe e Espagne.
E ko humpitooji keɓaaɗi holliri, laana dandugol yimɓe e maayo mawɗo mo Espagne, mo innde mum woni Salvamar Navia, rewinirii pirog oo haa e poor La Restinga, mo woni e komiin El Pinar, e duunde El Hierro.
Yimɓe 60 ɓe ngondino e oo laana ngiwri e leydiiji tati (3) : Gambie, Senegaal e Guinée.
Caggal nde ɓe njippii e poor La Restinga, ɗee emigranɓe keɓii ƴeewtagol cellal e juuɗe doktoorɓe e gollotooɓe cellal.
Ɓe keɓii kadi ballal jaawngal, ngam ƴeewtaade ngonka maɓɓe e wallude ɓe caggal balɗe jeegom ɗe ɓe mbaɗi e dow maayo mawɗo.
