Laana mayde e maayo mawɗo sara Djibouti : Emigranɓe 109 maayii, Union Africaine hollii miijo mum e dow ndee musiba.
Hooreejo Komisioŋ Union Africaine (UA), Mahmoud Ali Youssouf, hollii mettude ɓernde mum e yurmeende mawnde caggal maayde emigranɓe 109, ɓe sukaaɓe woni e hakkunde maɓɓe. Ɗee yimɓe maayii caggal nde laana mo ɓe ngondino e mum sunkiri e maayo mawɗo, sara leydi Djibouti. Ko e dow humpitooji ɗi Organisation des Nations unies (ONU) siiwti ndee musiba anndiraa. Mahmoud Ali Youssouf hollii wonde ndee musiba mettii mo no feewi, ɓurɗum sabu sukaaɓe ngoni e hakkunde yimɓe ɓe majjini nguurndam maɓɓe.
Union Africaine noddii ngam semmbinde jokkondiral hakkunde leydiiji
Caggal ndee musiba mawnde, hooreejo Union Africaine (UA) noddii leydiiji Afrik e leydiiji goɗɗi e aduna ngam ɓe semmbina jokkondiral e gollondiral maɓɓe, ngam haɓde e sabuiji ɗi ngaddata emigrasioŋ ngal rewataa laawol.
O ɗaɓɓitii kadi ngam ɓe ɓeydina haɓde e dentalji ɗi ngollata e nder jaaydeede e yahinde emigranɓe e laawol fewre, e yimɓe ɓe ngollata e nder njulaagu bonngu e dow yimɓe.
Reenugol nguurndam e teddungal emigranɓe
Union Africaine teeŋtinii kadi wonde ena jokka e angaasama mum ngam gollondirde e leydiiji ɗi ngoni e dental mum, e parteneerɓe mum e aduna.
Faandaare mum ko wallude ngam emigrasioŋ waɗeede e kisal, e jam, e laawol moƴƴol, tawa hakkeeji yimɓe ɗii ena ɗowee.
Dental ngal hollii kadi wonde reenugol nguurndam e teddungal emigranɓe ko huunde mawnde nde poti ɗowde e kala golle ɗe waɗetee e dow emigrasioŋ.
